Localisation:


Menu:
Internetowa Liturgia Godzin

Die 25 martii
IN ANNUNTIATIONE DOMINI
SOLLEMNITAS

Sexta



V. Deus, in adiutórium meum inténde.
R. Dómine, ad adiuvándum me festína.
Glória Patri, et Fílio, et Spirítui Sancto.
Sicut erat in princípio, et nunc et semper,
et in sæcula sæculórum. Amen. (T.P. Allelúia.)


Tempore Quadragesimæ:

Qua Christus hora sítiit
crucem vel in qua súbiit,
quos præstat in hac psállere
ditet siti iustítiæ.

Simul sit his esúries,
quam ipse de se sátiet,
crimen sit ut fastídium
virtúsque desidérium.

Charísma Sancti Spíritus
sic ínfluat psalléntibus,
ut carnis æstus frígeat
et mentis algos férveat.

Christum rogámus et Patrem,
Christi Patrísque Spíritum;
unum potens per ómnia,
fove precántes, Trínitas. Amen.

Tempore paschali:

Veníte, servi, súpplices,
et mente et ore extóllite
dignis beátum láudibus
nomen Dei cum cántico.

Hoc namque tempus illud est,
quo sæculórum iúdicem
iniústa morti trádidit
mortálium senténtia.

Et nos amóre débito,
timóre iusto súbditi,
advérsus omnes ímpetus
quos sævus hostis íncutit,

Unum rogémus et Patrem
Deum regémque Fílium
simúlque Sanctum Spíritum,
in Trinitáte Dóminum. Amen.


Qui plures Horas dicit, in una Hora sumit psalmodiam currentem, in ceteris - complementarem.

Ant. Ecce virgo concípiet et páriet fílium, et vocábitur nomen eius Emmánuel (T.P. allelúia).

Psalmus 122
Dominus fiducia populi
Duo cœci... clamaverunt: "Domine, miserere nostri, Fili David" (Mt 20, 30)

Ad te levávi óculos meos, *
qui hábitas in cælis.
Ecce sicut óculi servórum ad manus dominórum suórum, *
sicut óculi ancíllæ ad manus dóminæ suæ,
ita óculi nostri ad Dóminum Deum nostrum, *
donec misereátur nostri.
Miserére nostri, Dómine, miserére nostri, *
quia multum repléti sumus despectióne;
quia multum repléta est ánima nostra *
derisióne abundántium et despectióne superbórum.
Glória Patri, et Fílio, *
et Spirítui Sancto.
Sicut erat in princípio, et nunc et semper, *
et in sæcula sæculórum. Amen.

Psalmus 123
Adiutorium nostrum in nomine Domini
Dixit Dominus Paulo: "Noli timere... propter quod ego sum tecum" (Act 18, 9-10)

Nisi quia Dóminus erat in nobis, dicat nunc Israel, †
nisi quia Dóminus erat in nobis, *
cum exsúrgerent hómines in nos.
Forte vivos deglutíssent nos, *
cum irascerétur furor eórum in nos.
Fórsitan aqua absorbuísset nos, †
torrens pertransísset ánimam nostram, *
fórsitan pertransíssent ánimam nostram aquæ intumescéntes.
Benedíctus Dóminus, *
qui non dedit nos in direptiónem déntibus eórum.
Anima nostra sicut passer erépta est *
de láqueo venántium:
láqueus contrítus est, *
et nos erépti sumus.
Adiutórium nostrum in nómine Dómini, *
qui fecit cælum et terram.
Glória Patri, et Fílio, *
et Spirítui Sancto.
Sicut erat in princípio, et nunc et semper, *
et in sæcula sæculórum. Amen.

Psalmus 124
Dominus custos populi sui
Pax super Israel Dei (Gal 6, 16)

Qui confídunt in Dómino, sicut mons Sion: *
non commovébitur, in ætérnum manet.
Ierúsalem, montes in circúitu eius, †
et Dóminus in circúitu pópuli sui, *
ex hoc nunc et usque in sæculum.
Quia non requiéscet virga iniquitátis super sortem iustórum, *
ut non exténdant iusti ad iniquitátem manus suas.
Bénefac, Dómine, bonis *
et rectis corde.
Declinántes autem per vias pravas †
addúcet Dóminus cum operántibus iniquitátem. *
Pax super Israel.
Glória Patri, et Fílio, *
et Spirítui Sancto.
Sicut erat in princípio, et nunc et semper, *
et in sæcula sæculórum. Amen.

Ant. Ecce virgo concípiet et páriet fílium, et vocábitur nomen eius Emmánuel (T.P. allelúia).


1 Io 4, 10

In hoc est cáritas, non quasi nos dilexérimus Deum; sed quóniam ipse diléxit nos, et misit Fílium suum propitiatiónem pro peccátis nostris.

V. Ecce ancílla Dómini (T.P. allelúia).
R. Fiat mihi secúndum verbum tuum (T.P. allelúia).



Orémus. Deus, qui Verbum tuum in útero Vírginis Maríæ veritátem carnis humánæ suscípere voluísti, concéde, quæsumus, ut, qui Redemptórem nostrum Deum et hóminem confitémur, ipsíus étiam divínæ natúræ mereámur esse confórmes. Per Christum Dóminum nostrum. Amen.


Saltem in celebratione communi, additur acclamatio:

V. Benedicámus Dómino.
R. Deo grátias.



 Based on LITURGIA HORARUM IUXTA RITUM ROMANUM (editio typica)